Gal 5 | GAM | STEP | Ye kaye pai ba Krais wo ye i orko wori ge, ye alla kaye napane, ye kiwa moye dje i orko wori. Une embe yei ge ye aglo gi dje moye! Ye alla kaye pa boi kogo nayene! Man!

Galatians 5

Ye kaye napane, ye Krais boll kiwa moye

1 Ye kaye pai ba Krais wo ye i orko wori ge, ye alla kaye napane, ye kiwa moye dje i orko wori. Une embe yei ge ye aglo gi dje moye! Ye alla kaye pa boi kogo nayene! Man! 2 Na Pol molo kandja djindo ge ye pillme! Ye lo menameto molo, gaklene kelip tambon dje pi dal, Krais ye pille goi ge me ta napanda. 3 Ye djineke una ye gaklene kelip tane panda, na kandja dje pene woro ye porapora aundo. Lo merke pai ge ye ye kune yene mal. 4 No lo yembe yembona, God nale al kiwa mopon we dje pi dal, ye Krais boll namoye, ye djelldjell moye. Une ye wandill golo awi ge ye to worinj una moye. 5 Ge nayembon. Nono God Murble boll molo, God nale al wambo napanda kiwa mopon we dji ge nono embe mopon dje pillgi dje molo kui ye mopon. 6 Embe yembon ge, ye Krais Jisas boll aike moyeke, ye gaklene kelip tane mo natane ge wal kiwa. Wal kerman paro ge embe, pillgi dje molo po una boll kane wopake ye aumbon. Singare ge wal kerman. 7 Asa ye wopake yei ba, ipon una ne mal wo kond tugo awika kandja kaima pai ge ye alla keri? 8 God tugo awi mo? Ge man, God ye yau to dje ido iwa moro. 9 Pir mo? Yis kembis ta moya ba palawa al pakna pandaka, palawa yake kerman punda. 10 Embe pai pille na embe pro. God yendaka na nomana paro mal ye nomane embe panda. Ye nomane ta napanda. Alla iwa wo ye nomane ye ke ye awi iwa ge na nakando ba une top ke inda mal paro. 11 Agana ambana kambono, na ye gaklene kelip natoi dal, God ye i yem naworda we nadjindo, man. Na kandja embe djillka, una wo pille, na ye ke ye naumaka. Krais iko pera al goi we djinmon ge ke pille naumaka. 12 Ba ye nomane ye ke ye awinj kambono ge, ga yenekne gaklene kelip to, walkene bolo i worne.

13 Agana ambana kambono, ye kaye pa namoye, ye kiwa moye dje God ye dje i orko wori. Nono kaye naparmon, kiwa mormon pille nono makimb nomane asa pai mal singare embe yembon we nadjine, man. Ye God unakye moye al kane wopake ye awo, nu kogone yene! 14 Mosis lo porapora bolo wori pai ge me embe mal paro. Ni nenem kane wopake yenden mal ge ni agan ta moya al embe kane wopake ye aumben. 15 Embe dji ba ye kanpol tane. Ye yene mor al kunda nonga ye pa moi dal, ye ke mal moye, ami dje wopake moye kune nayenda.

God Murble boll wane mopon mal

16 Ye God Murble i wane moye. Embe yei dal, ye makimb nomane djindo mal ge alla nayene. 17 Ye makimb nomane pai ge ye molo God Murble kamblo kal worno dje yendo. Alla, God Murble moi ge ye makimb nomane kamblo kal worno dje yendo. Soka gingmang amblo mormellka, ye singare wopake yembon dje yenj ge, man panda. 18 Ba ye God Murble ye boll moi dal, Mosis lo menameto namoye.

19 Ye kaninj, una makimb nomane pandaka singare embe yene. Iwana kunumb no, singare nayene mal ye, singare ke ta mal yembon dje, 20 una god kende beke, gopne boglo awo, kum pa, una boll ke pille awo, kunda nonga ye, una wal moya kane ke pille awo, ellne kumbso awo, yene pille we ye, nonga dje djelldjell moyeke, nomane djelldjell panda moye. 21 Una djell wal wopake yenj al pille ke pille awo, nu no kanakana ye, iwana porapora pakna molo djingjang ke ye, una makimb nomane pai una ge embe yenj. Asa na ye boll aike molo kandja djill mal ge, na ipon alla dje pene woro ye aundo. Una singare embe yei dal, God dumoye al ge, er pakna napine.

22 Napine ba God Murble una boll moya ge, una singare embe yene. Una kane wopake ye awo, wo pille awo, tukne arngan yendaka, kiye dje molo, una moye al wandill golo awo, una boll ye wopake ye awo, una yenekne djine mal ye kune ye, 23 nale kane wane, singare yenj mal kanpol tane. Singare wopake embe paro ge Mosis lo al ge man we nadjindo. 24 Krais Jisas unakye nomane ke asa pai ge ga i iko pera al po nil to keri. Wal yembon dje pille pla ye wani ge, para ipo iko pera al nil to pagi. 25 God Murble nono boll moraka wanmon pille, une kandja djinda mal pille kane yembon. 26 Na iwa pla moro dje pille, una wal panda kane ke kane, kumbene kulag to as nayembon.